Senegalese striker Demba Ba chuan kum 16 zet professional football a khelh hnuah nimin khan kum 36 mi niin inkhelh a chawlhsan thu a puang.

Ba hian kumin June thla ni 19 mai khan Swiss club FC Lugano zawmin, kum khat daih contract a ziak a, mahse Lugano-a contract a ziah atanga thla thum hnuah a chawlh thu a puang a ni.

Kum 2005 khan French club Rouen-ah Ba hian a professional career bul a tan a, Rouen-a kum khat a awm hnuah Belgian club Mouscron-ah lutin, Mouscron-a kum khat a awm hnuah German club Hoffenheim chuan an lalut ve leh.

Kum 2011 kum tir khan West Ham chuan Ba hi Premier League-ah an hruai lut a, mahse Hammers tan hian kum chanve chiah khelin, Newcastle chuan kum 2011 nipuiah Ba hi an lei ve leh a, Newcastle atang hian mi hriat a hlawh chho tan a tih theih.

Ba hi Chelsea chuan kum 2013 January thla khan Newcastle atang hian an lei a, London club tan season khat leh a chanve a khelh hnuah Turkish club Besiktas chuan Ba hi euro maktaduai 6-in an lei a, mahse Besiktas-ah pawh Ba hi awm rei lovin, a kum lehah Chinese club Shanghai Shenhua-ah a lut.

Kum 2017 khan Shanghai Shenhua atang hian Ba hi Besiktas-ah loan-in a kir leh a, hetah hian Besiktas hi Turkish Super Lig title a lakpui. Turkish club dang Goztepe chuan Ba hi kum 2018 khan an lalut a, mahse kum chanve chiah Goztepe-a a awm hnuah China-ah bawk kirin Shanghai Shenhua bawk a zawm leh.

Tukish club Istanbul Basaksehir chuan Ba hi kum 2019 khan an lalut ve leh a, kum 2019-20 season khan Basaksehir hi Ba chuan Turkish Super Lig-ah a champui ve lehin, season hmasa zawh rual khan Basaksehir-ah a contract hmang zovin a chhuak zui a, Lugano-ah lut zuaiin, Ba hian a chawlh thu a puang ta a ni.

Ba hi kum 2007 atang khan Senegal tan a inlan tan a, Senegal tan bakah hian a pianna leh chenna France tan pawh khel thei mahse, a nu leh pate ram Senegal tana khelh thlangin, Senegal tan Ba hian game 22 khelin, goal 3 a khung bawk a ni.