​De Gea lei turin kan theih zawng zawng kan ti - Real Madrid

02nd September 2015, 01:09AM

Nizan khan Real Madrid leh Manchester United chu De Gea manah £29m in an inrem tih kan hria, tukina chanchinthar kan hriat erawh 'De Gea-a'n Real Madrid a zawm hman ta lo' tih kha a ni a.

Spain-ah transfer hun khar a ni tawh si, Real Madrid chuan De Gea an lei fel hman ta lo kha a ni a, khami chungchangah khan Real Madrid an lawmlo hle a, United chu hun tikhawtlai luiah an puh, United erawh an insawithiam ve tho, Real Madrid chuan FIFA-ah hemi chungchang hi an zualko dawn tih an sawi chiang tawh a ni.

Real Madrid chuan thuchhuah siamin, 'United hian thawhtanni khan inbiakna hun an hawng chauhva, keini chuan a theih anga rangin kan be nghal. De Gea manah Navas kaltir kan tum, inremna pawh kan nei nghal. Real chuan chawhnu her dar 1:39 (Spanish Time)-ah engkim kan peih fel tawh a.

'United chuan zan dar 9:43 PM-ah min chhang chiah. Zanlaiah De Gea lehkha pawimawh min thawn a, mahse kan dawn meuh chuan zanlai dar 12:02 a ni tawh, chutah chuan transfer hun a inkhar tawh si a' tiin.

Manchester United chuan Real Madrid statement hi an chhanglet ve leh nghal a,'United chuan document engkim kan thawn alawm, mahse IT (Information technology) lamah Real Madrid khan harsatna an neih avangin kan thil thawn kha an download thei ta lo a ni. Tin, Real Madrid khan a hun takah De Gea registration kha Spanish league-ah an thehlut lo bawk a ni,' tiin.

De Gea khan Real Madrid a pan ngei tawh dawn niin khawvel chuan a ngai, mahse kum 24 mi hi United-a a cham a la ngai dawn ta niin a lang. Real Madrid hian FIFA lamah an zualko a nih chuan a chungchang hi engtin nge an kalpui zel dawn hriat a ni lo a ni.

Manchester United hian goalkeeper tha pali an nei ta der mai a, De Gea, Sergio Romero leh Sam Johnstone te niin, Victor Valdes chuan Besiktas a zawm theih tak loh avangin Man Utd-ah a cham dawn ta bawk niin a lang. January transfer window inhawn hunah emaw nakkum nipui bazarah emaw De Gea hi a chhuak thei chauh dawn niin a lang ta a ni.

picture credit : Reuters

Copyright © inkhel.com 2024. All rights reserved.