Nilaini zan khan Merseyside Derby-ah Liverpool an tlawm tlat mai. Champion tumin theihtawp chhuah mah se, Goodison Park-ah si hnih faiin Everton lakah an tlawm.

Everton goal hnih te hi set piece atanga lut ve ve a ni a, first half-ah Branthwaite chuan goal hmahruai a khung a, second half tir lamah Calvert-Lewin chuan Everton goal hnihna a khung.

Khelh 34 atangin Liverpool chuan point 74 an nei a, hmahruaitu Arsenal chu point 3-in an thlau mek. Anni aia game hniha khel tlem zawk Manchester City chuan point 73 an nei a, title race-ah Liverpool dinhmun a chhe ta hle.

Inkhelh zawhah Liverpool boss Jurgen Klopp chuan, "City leh Arsenal chetsual ve a ngai, keini erawh kan chak chhoh zel a ngai thung ang a.

"City leh Arsenal te hi chak lo chho ve zel se, chutih laiin zanina kan khelh angin khel ila, kan chak loh chhoh ve zel erawh chuan awmzia a awm dawn lo. Champions League khel phak dinhmun pawh kan beisei thei lo ang.

"Kha aia thaa kan khelh a ngai, goal hmaah kan hmanhmawh deuh mah mah thin, kan game khelh zawh tak ho anga goal khung vak vak tur anga kan inngai a nih chuan a dik lo a, kan theihtawp kan chhuah ziah a ngai zel dawn a ni.

"Kan rilru puthmang a dik tawk lo niin an ngai a ni maithei, hei erawh a ni bik lo. Chutih laiin inrintawkna ka nau ten an neih zel theih nan keimah hi ka pawimawh a ni.

"Kan thawh leh vat a ngai ang. Taksa mai bakah, rilru lama inpeihna kan neih a ngai bawk ang. West Ham kan hmachhawn leh dawn a, a tha thei ang bera kan khelh a ngai dawn a ni," tiin a sawi.

Goodison Park-ah kum 14 emaw vel lai chak loh nei loa an kal tluan hnuah Klopp chuan a naute a tlawmpui, amah pawhin hrehawm a ti hle.

"Fans lam rilru tur pawh ka hriatpui, a pawi ka ti khawp mai. Derby-ah record tha tak kan nei thin. Kan chak lo ngai lo tluk a ni a, kan result avangin ngaihdam ka dil e.

"Kei pawhin hrehawm ka ti hle, kan khelh dan kha a tha tawk lo a ni. Everton kha an tum dan angin kan khelh tir a ni ber a, set-piece atangin goal hnih kan khung tir.

"Goal khung tuma kan nawr tuma, kan khung loh hnuah chiah Everton lamin chance hlauhawm an rawn nei ve zat thin. Second half kan khel tha lo hle a, chance tha pawh kan insiam tam thei lo a ni," tiin Klopp chuan a sawi bawk.