2016/17 Hero I-League Champions Aizawl FC full back Lalramchullova chuan East Bengal a zawm ngei dawn niin a lang.

East Bengal hotute leh Chullova agent-te chuan indawrna mumal tak an nei tawh a ni tih inkhel.com chuan a hria a, darkar 48 chhungin inkhel.com chuan engkim a chiang tawh dawn niin a ngai.

I-League khelh zawh takah khan pathumna East Bengal chuan goal 15 lai an chhuah a, top 3 zinga goal chhuah hnem ber an ni. Hei vang hian an tlar hnung thawmthat nan Champion team ami defender an ngaihven ta nghal chat a.

Federation Cup khelh lai atang tawh khan indawrna a awm ngei niin inkhel.com chuan a hria a, goal ven kawngah leh goal khung tuma nawrna kawngah Chullova hian Aizawl FC tan tha a thawh hlawk hle, hei vang hian East Bengal chuan an ngaihven ta nghal chat a ni.

Kum engzat atan nge an indawr tih hriat a ni lova, East Bengal-in Robert Lalthlamuana an lakluh tirha an dawrna ang velin Chullova pawh hi an dawr nia rin a ni.