Champions League title la hnem manager te

14th September 2021, 09:09PM

Europe khawmualpuia football hmanga inelnaah chuan UEFA Champions League aia ropui a awm lo a, league hrang hranga club tha zualte chuan he trophy lak tum hian khelmualah theihtawp an chhuah thin a ni.

1992 atang khan tuna a hming UEFA Champions League tih hi a pu tan a, chu mi hma chuan European Cup tih a ni thin a, 1955 atang khan he inelna hi an nei tan a. Spanish club lian Real Madrid chu he inelna bika hlawhtling ber an ni mek a, vawi 13 zet chu an champion tawh a ni.

UEFA Champions League title lak hnem lamah hian Real Madrid dawttu chu Serie A club lian AC Milan an ni a, anni hian vawi 7 chu trophy hi an la ve tawh a. Bundesliga club lian Bayern Munich leh Premier League club Liverpool te chu pathumnaah awmin, heng club pahnihte hi vawi 6 ve ve an champion tawh bawk a ni.

Season hman zawh takah khan Champions League final-ah Premier League club pahnih an inkhel a, Chelsea chuan Manchester City chu 1-0 in an hneh a, European champion an ni mek a. Tun season-ah an title kawl chu humhim ngei an tum dawn a ni.

Champions League huangah hian tun hma atangin manager pathum chauhin he trophy hi vawi 3 an la tling thei a. Liverpool manager lar Bob Paisley kha hetianga European title vawi 3 la thei hmasa ber niin, 1977, 1978 leh 1981 ah te khan Liverpool chu a champion pui a ni.

Italian manager Carlo Ancelotti chuan 2003, 2007 leh 2014 ah te khan Champions League trophy a lo la tawh bawk a. A hmasa pahnih chu AC Milan a lakpui niin, a vawi thumna chu Real Madrid a lakpui bawk a ni.

Zinedine Zidane chuan 2016, 2017 leh 2018 ah te khan UEFA Champions League trophy a la a, French coach hian Real Madrid a enkawl laia a lak vek niin, amah chiah hi a zawna vawi 3 champion thei a la ni.

Carlo Ancelotti leh Zinedine Zidane te pahnih bakah hian Manchester City manager Pep Guardiola leh AS Roma maager Jose Mourinho te chu la chawl lo zinga Champions League trophy la hnem zinga lang thei te an ni.

Jose Villalonga (1956, 1957) chuan Real Madrid chu vawi 2 a champion pui a, amah ang bawk hian Luis Carniglia (1958, 1959 - Real Madrid), Bella Guttmann (1961, 1962 - Benfica), Helenio Herrera (1964, 1965 - Inter Milan), Miguel Munoz (1960, 1966 - Real Madrid), Nereo Rocco (1963, 1969 - AC Milan), Stefan Kovacs (1972, 1973 - Ajax), Dettmar Cramer (1975, 1976 - Bayern Munich), Brian Clough (1979, 1980 - Nottingham Forest), Ernst Happel (1970, 1983 - Feyenoord, Hamburger SV), Arrigo Sacchi (1989, 1990 - AC Milan), Ottmar Hitzfeld (1997, 2001 - Borussia Dortmund, Bayern Munich), Vicente del Bosque (2000, 2002 - Real Madrid), Sir Alex Ferguson (1998, 2008 - Manchester United), Jose Mourinho (2004, 2010 - FC Porto, Inter Milan), Pep Guardiola (2009, 2011 - FC Barcelona) leh Jupp Heynckes (1998, 2013 - Real Madrid, Bayern Munich) te pawh vawi hnih theuh chu an champion tawh bawk a ni.

Copyright © inkhel.com 2021. All rights reserved.