Scottish club Celtic chuan an manager thar atan Ange Postecoglou an lalut fela, thla 12 daih contract an ziahpui thu an puanga, Postecoglou-a contract hi a tul anga pawhsei belh theih tura tih a ni.

Kumin February thla khan Neil Lennon chuan Celtic manager a nihna a bansana, Celtic hian manager nghet la lovin, season zawh thleng John Kennedy chu an manager atan an chhawr lailawk.

Celtic hian Bournemouth manager hlui Eddie Howe chu an manager thar atan lakluh tum viau mahse an inbiakna an tlawlha, Howe dawta an mi duh ber nia sawi Postecoglou hi an lalut thei ta a ni.

Kum 55 mi Postecoglou hi Celtic hian Japanese club Yokohama F. Marinos atangin an laluta, Postecoglou hian kum 2019 khan Yokohama F. Marinos hi J League-ah a champion pui nghe nghe.

Postecoglou hian kum 2013-a Australia national team a enkawl hma in Brisbane Roar a enkawl thina, Brisbane Roar hi A-League ah vawi hnih a champion puia, sulhnu a nei theuneu lem lo hle.

Postecoglou hian kum li chhung Australia a enkawla, kum 2014 khan Australia hi FIFA World Cup khel tura a tlinpui bakah kum 2015 khan Asia Cup-ah a champion pui bawk a ni.