Vitality Stadium-ah Bournemouth leh Manchester United te chu 2-2 in an inhnehtawk. Bournemouth lamin vawi hnih hma an hruai a, Bruno Fernandes chuan United siphurh a rul ve ve.

Sky Sports pundit Jamie Redknapp chuan United player thenkhat te chu inkhel ve mai mai nia a hmuh thu a sawi a, chutih laiin Bruno Fernandes erawh club tana hma ngai tak nia a hmuh thu a sawi bawk.

"Dinhmu tha lo taka din chang hian, player thenkhat chuan an dinhmun engahmah an ngai lo thin. Chu chu United team-ah hian ka hmu a ni, an dinhmun tha lo hi enga tan mah an ngai lo hlawm.

"Fernandes erawh theihtawp a chhuah thin, club a hmangaih a, team tana tha tur ber a ngaihtuah a, theihtawpin a team-te a fuih thin.

"United team-ah hian Champions League no mawi lo chawi tawh an awm ve nual, anni ho hian an dinhmun tha lo hi engah vak an ngai lo niin ka hria.

"Casemiro inkhel hi kum eng emaw zat chu ka en ta, defensive midfielder zingah chuan ka duh leh ngainat ber pakhat a ni, a inkhel en hi a nuam ka ti thin em em.

"Tunah erawh charity football khel ve mai mai hi a ang ka ti ta hle. Ropui takin England-ah a lo lut a, mahse Premier League a ni si an khelh hi.

"Rodri-a inkhel hi hmuhnawm ka ti thin, a thian te theihtawpin a pui thin, hetiang hian Casemiro pawh hian a khel tur niah ka ngai.

"Casemiro hian player naupang zawk te entawn turin a khel lo, a khelh dan hi a tha tawk lo hle a ni," tiin Jamie Redknapp chuan a sawi.

Point khat chiah an hlawhchhuah avangin Spurs hnehtu Newcastle United chuan Manchester United an lehpel. Premier league table-ah United chu 7-na an ni ta a, point 50 ve ve Magpies nen hian an nei a, goal difference-ah Red Devils an hnufum zawk.

Vitality Stadium-ah Manchester United an vannei hle a, Solanke leh Kluivert ten Bournemouth tan goal an khung a, Man United tan Bruno Fernandes chuan goal hnih a khung.

Manchester United game duhthu a sam lo, chance hlauhawm pawh an nei tam thei lo a, an goal-ah an khingpui ten a pet hnem em em, an khelh dan en hi chuan Champions League spot beisei tur pawh an ni lo niin a lang.