Khelh hmabak game 5 la awm mah se, Xabi Alonso chuan Bundesliga game 29-ah Bayer Leverkusen a champion pui ta.

Pathianni zan khan Leverkusen chuan Werder Bremen an mikhual a, Wirtz chuan hattrick siamin, Boniface leh Xhaka ten goal khat ve ve an khung, mual neituin 5-0 in hnehna an chang a, 2023-24 Bundesliga champions an ni ta a ni.

Khelh 29 atangin Leverkusen hian point 79 an hlawhchhuak a, anmahni hnaih bertu leh season hmasa lama champion Bayern Munich chuan point 16 laiin an phak lo.

German top flight league-ah Leverkusen hi an vawi khat champion na a ni a, tum 5 zet pahnihna an lo ni tawh a, 2001/02 season khan Bundesliga, DFB Pokal leh Champions League-ah pahnihna an ni.

Tun season hian treble theihna an nei mek, chak loh nei loin tun season an hmang mek a, DFB Pokal-ah final lutin, May ni 25-ah FC Kaiserslautern nen final an khel ang.

Europa League lamah pawh an la dam a, quarter-finals 1st leg-ah si hnih faiin English club West Ham an hneh a, semi final lut turin dinhmun tha takah an ding mek bawk.

Tun season Bundesliga-ah Lererkusen hian game 29 atangin vawi 25 lai hnehna an chang a, vawi 4 an khingpui an inhnehtawkpui. Goal 72 lawih an khung a, goal 19 chiah an chhuah.

Hming langsar ber chu Xabi Alonso a ni kan ti thei awm e. Kum 42 mi hian October 2022 khan Leverkusen hi a zawm a, a zawm tirh khan relegation zone-ah an awm. Season a zawh meuh chuan Bundesliga table-ah 6-na a nih pui.

Pangngai taka season bul a tan zet chuan league no mawi a chawipui nghal der mai. Spanish coach hi Bayern Munich leh Liverpool te chuan an team enkawl turin thlem mah se, ngun taka a inngaihtuah hnuah Bayer Leverkusen-a cham chhunzawm zel a thlan thu thla hmasa thla tawp lam khan a sawi.