Brentford defender thar Ajer

22nd July 2021, 09:07AM

Season thara Premier League khel tur Brentford chu an inbuatsaih mek zela, an tlar hnung lam thawmthat nan Norwegian centre-back Kristoffer Ajer chu Scottish club Celtic atangin an lalut fel.

Kum 23 mi Ajer-a manah hian Brentford hian pound maktaduai 13.5 an senga, kum nga daih contract ziahpuiin, a man hi a chet dana zirin a la pung thei dawn bawk a ni.

Ajer hi season thara Premier League khel tur dang Norwich City pawhin an ngaihven ve viaua, mahse Brentford hian an chang ta zawka, tunkar khan medical nei felin nimin khan Brentford hian an lalut fel.

Ajer hi Norwegian club Lillestrom academy chhuak a ni a, kum 2014 khan Start-in an lalutin, Start atang hian Celtic chuan kum 2016 khan an laluta, season liamta khan Celtic tan ghame 47 khelin, goal 2 a khung bawk.

Brentford manager Thomas Frank chuan Ajer an lakluh chungchang sawiin, “Centre-back lakluh belh kan duha, Ajer hi kan lakluh duh ber a ni bawk. Kan mamawh ang tak player a niin kan hria a, Scottish league lamah a che tha a, kan box chhung leh lehlam box-ah kan tan a pawimawh dawn a ni,” a ti.

 

Copyright © inkhel.com 2021. All rights reserved.