T Mobile Arena, Las Vegas, Nevada, USA-ah UFC 300 neih zawh a ni a, he event-ah hian fight card anga main event ber ni lo, Mipui te main event an tih hial BMF title inchuhna ah Max ‘Blessed’ Holloway chuan Justin Gaethje hnehin BMF champion thar a ni a, second khat lek awm tawha Justin Gaethje a knockout chu MMA khawvelin a ngaihven a, fight of the Night leh Performance of the Night bonus a dawn phah a, US Dollar 600000 lawih a dawng. Justin Gaethje chuan Holloway nena an insual chu Fight of the Night-ah thlan niin; US Dollar 300000 a dawng ve bawk.
UFC 300-ah hian main event lamah lightheavyweight champion Alex ‘Hands of Stone’ Pereira chuan first round-ah a left hook hmanga Jamahal hill a hnek thluk hnuin a kut veilam hmangin a chum zui nghal miah miah a, referee Herb Dean inrawlh vatin a threlh nghal vat. Pereira hi Hill knockout thei hmasa ber a ni nghe nghe bawkReplay atanga en let pawhin Pereira hian a left hook hmanga a hnek thluk hnu hian Jamahal Hill hi khel thei ziazang a ni tawh lova, first round knockout-in Pereira chakah puan a ni nghe nghe.
Kum 36 na hmang Pereira hian nikum November thla khan Jiri Prochazka a tuk tlawm hnua a title fight neih leh hmasa berah harsa lo takin a title kawllai a humhim chiang hle. Pereira thianpa leh a bjj coach ni bawk Glover Texeira chuan a thianpa Pereira chak veleh bjj black belt a phu tih hriaiin a hren tir zui.
Light heavyweight champion Alex Pereira chuan heavyweight huanga intihrit a duhthu sawiin, chona lian zawk hmachhawn a inpeih reng thu a sawi.
Có-main event-ah Zhang Weili chuan a vawi hnih nan a strawweight kawnghren kawllai chu a humhim bawk a, amah chotu Yan Xiaonan chu unanimous decision-in a hneh bawk. Round tir lamah phei chuan champion lai Weili chuan a rêk tlawm dawn niin a lang hman a, tharum a hman nasat deuh langin an khelh chhoh zel hnuin a chau deuhin a lang chho. Champion tawnhriat nei tawh anih na lang chhovin a insiamrem chho leh thei a, round an khelh zawh meuh chuan judge pathum te chuan 49-45 theuhin Zhang Weili an hmu chak vek thung.
BMF Title inchuhna ah Max Holloway chuan second khat chiah a awm tawhah Justin Gaethje a knockout bawk. An insual tan phat atang Holloway a chungnung angreng a, round khatna tawp dawnah spinning back kick hmangin Gaethje hnar a pèt tliah sak. Knockout artist hmingthang Gaethje chuan a hnar atanga thaw tawh lovin a ka ang chungin a thaw chhuak leh thin a, a che velah pawh a muan deuh phahin a hriat theih.
Gaethje chuan knockout tumin a kut thlawh chhuak thin mah se; Holloway a inbum thiam em em a, taksa ruangam lama te zawk Holloway chuan a boxing thiamna hmang tangkaiin a hnek fuh leh nawlh zel. Round 3 thleng an khelh hnu pawhin Holloway a chungnung chho zela, championship round an thlen chhoh hnuin Gaethje chuan Holloway hnek thlu zuai mah se; a tho leh nghal thung.
Second tam pawh a awm tawhloh tihah Holloway chuan Octagon lai takah inhnek pui miah miahin overhand right hmangin a hnek thlu tawp a, a hmuna entu mipui sing chuang pawh an awm hle hle thei ta lo. Midang a knockout nasat em avanga a hming lema ‘The Highlight’ an tih hial Justin Gaethje chu second khat vel chiah a la awm tihah bawkkhup zawngin a tlusawp hnawka, knockout hmangin Holloway chakah puan a nih chiah phei chuan a hmuna entu thawm a ring hle nghe nghe.
Holloway chuan BMF title a hren hnu chuan pawr takin featherweight champion Ilia Topuria a cho thu a sawi nghal a, lightweight champion lai Islam Makhachev hming pawh sawiin a hlauh loh hmel hle tih a hriat theih.
Lightweight bout hmuhnawm takah Armen Tsurukyan chuan split decision-in Charles Oliveira a hneh hram. An insual tan phat atang boruak a sang a, inpawmchilh thiam hmingthang Oliviera chuan guilotine choke hmanga man betin a chak dawnin a lang hman. Mipui thawm ring tak karah Arman Tsurukyan a talchhuak leh si.
Armenian chhul chhuak Tsurukyan chuan Oliveira titlu ve lehin a kiu hmangin a chhu zui miah miah bawka, a kiu hmanga a chhut nasat tak em avangin thisen a chhuak nasa hman hle. Minute 5 vel chauh a awm tihah Tsurukyan chuan a titlu leh thin a, second rei a awm tawhloh hnuin Oliveira rawn che tha ve lehin submission hmangin a man fuh ve leha, hun tawp dawn anih takah uiawm takin a zo ta a, inhnehtawk takah split decision-in Arman Tsurukyan a chak hram ta thung.
Main card opener-ah Bo Nickal chuan MMA khawvelah hnehlo neilo chhunzawm zelin second round submission-in Cody Brundage a rêk tlawm bawk.
Prelims card huanga main event-ah Jiri Prochazka leh Alexander innuai pawh a hmuhnawm miah miah e. Mipui sing chuang pungkhawm hmaah Rakic chuan bul a tan tha a, a ke lek chhuakin Prochazka kaiza a pêt nawn mawlh mawlh. Light heavyweight champion hlui Prochazka pawh a che vel a muan phah deuha, second round an thlen chhoh hnuin Rakic chuan Prochazka khabe a hnek fuh leh thin a, Prochazka chuan hnungtawlh aiin a nawr nasa telh telh thung. Czech Republic chhul chhuak Prochazka chuan chiang taka a hnek fuh hnuin Rakic a talbuai chho. Octagon chhuatah a tluk hnuin Jiri Prochazka chuan remchang bawhpelh lovin a hnek zui nghal mawlh mawlh a, second round-ah technical knockout hmangin a chak ta nghe nghe.
Aljamain Sterling chuan featherweight debut-ah unanimous decision-in Calvin Kattar a hneh bawk. An insual chhung zawngin Sterling chuan inpawmchilh lama a thiamna hmang tangkaiin a titlu nawn mawlh mawlh a ni ber. NCAA Division III Wrestler Sterling chuan a tihtluk hnuin a bawhbet ngar ngar a ni ber a, mipui lam pawh an lungawi lutuk lem lova, bantamweight champion hlui Sterling erawhin hnehna a chan theih nan a pawimawh thung si.
PFL Featherweight champion hlui Kayla Harrison chuan UFC Debut-ah UFC Champion hlui Holly Holm chu second round submission hmangin a hneh bawk. Vawi hnih lai Olympic judo gold medallist ni thei Kayla Harrison-i chuan a inbuan thiamna hmang tangkaiin a keuh thlu a, a bawhbet hnuin a kiu hmangin a chhu zui mawlh mawlh. Round hnihna an thlen chhoh hnuin a keuh thlu leha, kum 42 na hmang mek Holly Holm-i chuan talchhuah tum viau mah se a thei ngang lova, amah aia tharum ngah zawk Harrison-i chuan a rêk tlawm zui nghe nghe. Featherweight bout-ah Diego Lopes chuan first round technical knockout-in Sodiq Yusuf a hneh bawk a, mipui lam thawm pawh a ring ang reng hle bawk.
Early Preliminary card pawh a hmuhnawm miah miah hlawm hle. Lightweight bout-ah Jalin Turner chuan round hmasa berah Renato Moicano hnek tlu mah se, tawnhriat ngah tawh Moicano a insiamrem vat thung a, second round-ah Moicano chuan bjj black belt anih na hmang tangkaiin a titlu leh thung. Hemi hnu hian thutchilh zuiin a hnek nghal miah miah hnuin technical knockout hmangin hnehna a chang leh thei.
Strawweight bout-ah champion hlui Jessica Andrade chuan split decision-in Marina Rodriguez a hneh hram a, lightweight insual hmuhnawm takah Bobby Green chuan Jim Miller a hnek thi hnuang hnuin unanimous decision-in a chak bawk. Preliminary card hmasa berah Flyweight champion hlui Deiveson Figuereido chuan bantamweight champion lo ni tawh Cody Garbrandt chu round hnihna-ah a tihtluk hnuin a rěk tlawm bawk.