Bayern-ah Goretzka a nghet

16th September 2021, 01:09PM

Bayern Munich chuan an midfielder Leon Goretzka chu contract thar an ziahpui a, Goretzka contract thar hian kum 2026 June thla thleng a daih a ni.

Nipui bazar lai khan German midfielder Goretzka hi Manchester United nen sawizawm a ni a, nakkumah United hian an lalut dawn angin chanchinbu thenkhat chuan tarlang nasa hle mahse, kum 26 mi hian Bayern-ah kum nga daih contract thar a ziah ta zawk a ni.

Goretzka hian contract thar a ziah hma hian tun season daih bak Bayern-ah contract a nei tawh lova, hemi avang hian United bakah club dang pawhin an ngaihven viau nia sawi a ni a, mahse tunah erawh Bayern-ah a nghet rih tih a chiang tawh.

Goretzka hian a contract tharah hian kum khatah euro maktaduai 12 atanga euro maktaduai 15 bawr vel a hlawh dawn nia sawi a ni.

Contract thar a ziah chungchang sawiin Goretzka chuan, “Kum thum liamta chhung khan champion theihna zawng zawngah kan champion fai vek a, chu chu chhunzawm zel kan duh. Bayern-ah hian ka tlangnel em em a, kum 2026 thleng ka contract ka pawtsei thei hi ka lawm hle a ni,” a ti.

Goretzka hi German club VfL Bochum academy chhuak a ni a, kum 2013 khan Schalke-ah lutin, kum 2018 khan Bayern Munich hian lalutin, kum li daih contract an ziahpui a ni.

Copyright © inkhel.com 2024. All rights reserved.