El Clasico-a Lamine Yamal tih goal an pawmsak loh avangin Barcelona an lungawi thei lova, an president Joan Laporta chuan dan hmanga hmalak a pawi tilo.

Yamal hian 2-2 a an inhnehtawk laiin, an goal thumna a khung emaw ati a, lawm pawh an lawm hman viau mai. Thil thlen lai hian goal line hnung hretah Real Madrid goalkeeper Andriy Lunin a ding a, a theih anga rangin ball a bengchhuak nghal.

Barca-in a goal ngei ti mahse, goal line technology hmanga nemnghehna tur an nei lova, video assistant referee (VAR) pawhin rin a pel ngei tih a finfiah thei lo. Santiago Bernabeu-a inkhelah hian 3-2 in Real an chak a, Jude Bellingham chuan an chakna goal khungin an hmelma lian ber an hneh.

An inkhelh atangin thum vel liam tawh mahse, chanchin an la nei zui zel a, a tawp rih dawn lo niin a lang. Barca hian Spanish FA hnuaia awm, Technical Refereeing Committee hnenah official-te inbiakna leh video an phut a, ennawn veleh phawt an duh.

Laporta chuan, "Kimchang takin kan ennawn ang a, thil dik lo a awm anih chuan hma kan la ang. Tihsual a awm chuan result tih danglam kan ngen dawn a, dan angin engkim kan ti ang. Hmun danga an tih angin, inkhelh that erawh kan phut dawn lova, goal chungchang hi hriat chian kan duh ber." tiin a sawi.

Tun season tir lam khan, VAR tihsual avangin Belgian Pro League-ah Anderlecht leh Genk an inkhel tha a, Court of Arbitration for Sport-in an remti lo thung. Liverpool boss Jurgen Klopp pawhin Tottenham an hmachhawn tuma Luis Diaz tih goal an pawm loh avangin inkhelh that a rawt a, anih dan tur thlapin VAR an hmang lo tih a sawi.

Barcelona manager Xavi Hernandez chuan an chunga thil thleng hi in tih mualphona tiin a sawi a, goal line technology an neih ve loh avangin Spanish FA a dem. Goal line technology hi goal leh goal loh enna ber a ni a, Spain-ah an la hmang ve lo a ni.