Barcelona chhuahsan a tum thu a puan hnuah, Xavi chuan a thutlukna a thlak leh thu a sawi a, Barcelona coach hna thawh chhunzawm zel a tum thu a sawi chiang.

Nilaini khan kum 44 mi Xavi chuan club director Deco a titipui a, a thutlukna lo siam tawh chu a sut leh. Ningani khan Barcelona chuan Xavi chu an coach ni chhunzawm zel tur a nih thu an puang ve bawk.

Xavi chuan, "Barcelona-ah hian hna zawh loh ka la nei, thawm thata, theihtawp chhuah chhunzawm zel ka tum, hei hi club thutlukna a ni bawk.

"Barca fan ruh tak ka ni, president leh board of director te ka ringtawk em em. Player te pawhin min thlawp tha a, hei hi ka thutlukna ka sut leh chhan pakhat a ni bawk e.

"Mi tam tak bakah, ka player ten hna zawh loh ka neih thu min hrilh a, chu chu thutlukna thar ka siam leh chhan chu a ni," tiin a sawi.

Kumin January thla khan Barcelona manager nihna a chawlhsan tur thu a puang a nih kha, Xavi chuan, "Khatih laia ka thutlukna kha, a hun lai kha chuan ka tihtur a ni.

"Mahse tunah erawh thutlukna ka siam sual ta tih ka hre chhuak.  Kan president hnenah ka ban loh tur thu ka hrilh chiang tawh a, eng pawh thleng se chhunzawm ka tum zel dawn a ni," tiin a sawi bawk.

Tun season chu Barcelona a che ropui lo khawp mai. La Liga-ah an title an humhim zo dawn lo niin a lang a, Champions League quarter-finals atangin an tla bawk. 

Sum lamah harsatna an la tawk reng bawk nen, heti chung hian Xavi chuan sang taka Barcelona vawrh leh tumin season thar chu hma an la leh dawn a ni.