Nilaini zan khan Old Trafford-ah Manchester United chuan Sheffield United an mikhual a, mual neitu lam hian 4-2 in hnehna an chang.

Andre Onana a chetsual avangin Bogle chuan mikhual lam tan goal a khung, hei hi a lu hmangin Maguire chuan a rul.

Second half tir lamah Brereton Diaz chuan Sheff United hma a hruaipui leh a, Bruno Fernandes chuan penalty atangin United siphurh a rul leh.

Hun tawp dawn minute 9 a la awmin box pawn atangin Bruno Fernandes chuan mawi lutukin a chhuih goal, Man United hma a hruaipui ve ta.

Minute 5 a la awmin Bruno siam sak chu Hojlund chuan goal-ah a chantir ve leh a, 4-2 in Manchester United chuan hnehna an chang ta a ni.

Inkhelh zawhah dinhmun derthawng mek nia sawi Erik ten Hag chuan an khelh dan a chhuang hle.

"Game tha tak a ni a, entu mipui te tan a ni e. Goal 4 kan khung bakah chance hlauhawm kan siam teuh a, kan khel kha a mawi em em.

"Kan khel tha hle niin ka hria, chance kan nei hnem bawk a. Kan game kha fakna tur a tam a, sawisel tur pawh a awm ve zeuh tho mai, goal hnih awlsam takin kan chhuah, kha kha pawmzam chi a ni lo.

"Attacking football hmuhnawm tak khelh kan duh, chu chu kan hmu ta chiah mai. Thlasik a liam hnu khan kan game a mawi a, chance hlauhawm pawh kan nei hnem a, goal pawh kan khung hnem bawk.

"Bruno Fernandes hi tunlai chu a tluang khawp mai, team hruaitu a nih angin tha takin team a kaihruai, a khelh danah ka lawm kher mai," tiin Erik ten Hag chuan inkhelh zawhah a sawi.