Pathianni zan khan PSG chuan Saint-Étienne an tlawh a, goal chhuah hmasa zawkah tang mah se PSG hian 3-1 in hnehna an chang.
PSG tan Marquinhos chuan goal hnih khungin Di Maria chuan goal khat a khung bawk a. PSG goal thumte hi Messi-a assist vek a ni.
Tan atanga minute 23-naah mual neitu Saint-Étienne chuan Denis Bouanga hmangin goal an khung. First half tawp dawnah Mbappe-a free ball um chu Timothee Kolodziejczak chuan a tackle tlu.
Referee chuan Timothee Kolodziejczak hi a hnawtchhuak a, PSG chuan free kick hlawhchhuakin Messi chuan a pet a, PSG captain Marquinhos chuan a tauh goal, first half a tawp chhunzawm a, 1-1 in an inhnehtawk.
Minute 79-ah Messi chuan angle zim tak kar atangin Di Maria-a tan ball tha tak a pe, Di Maria chuan box dinglam sir atangin a ke veilamin chiang takin a pet goal, PSG chuan hma an hruai ta.
Hun tawp dawn tak tak 90+1 minute-ah mual veilam sirah Messi chuan ball chak takin a tlanpui, a vawrh tha tak chu Marquinhos chuan a tauh goal leh, hun a tawp chhunzawm a, 3-1 in PSG chuan hnehna an chang ta a ni.
PSG hian Ligue 1 game 15 khel tawhin point 40 an hlawhchhuak ta a, anmahni hnaih bertu hi Nice niin point 14 laiin an inthlau.
He match-ah hian Neymar chuan hliam na tak a tuar, hun tawp dawnah takle a ni a, a ke rek a thlep deuh hnawp mai.
PSG manager Pochettino chuan Neymar-a hliam chu a serious thu a sawi a, na a tih thu leh naktuk lama endik a nih tur thu a sawi. Kumin chhung chuan mual chhungah a hmel kan hmuh theih a rinawm tawh chiah loh a ni.