AIFF Footballer of the Year Sandesh Jhingan

21st July 2021, 09:07PM

ATK Mohun Bagan defender Sandesh Jhingan chu All India Football Federation (AIFF) chuan mipa zinga football thiam berah thlangin Footballer of the Year chawimawina an hlan a. Bengaluru FC midfielder Suresh Singh Wangjam chu Emerging Player atan an thlang.

Sandesh Jhingan hi defender zingah chuan AIFF Footballer of the Year chawimawina dawng thei hmasa ber a ni a. Footballer tha tak a ni tih a chianna chu 2014 ah khan Emerging Player of the Year chawimawina pawh a lo dawng tawh a ni.

Chawimawina dawng turte hi Indian Super League club coach te leh I-League club coach te chuan an thlang a, vote an thlak atanga vote hmu sangte hnenah chawimawina hi an hlan ta a ni.

Jhingan chuan chawimawina a dawn chungchangah, “Hetiang chawimawina ka dawng thei hi lawmawm ka ti hle a. He chawimawina hian a hma aia tha zawk nih duhna thinlung min puttir se ka duh a, mi dangte tan pawh football hi tih tak zeta khelh a pawimawh zia te, luhchilh tlak a nih zia te lantir theitu nih zel ka tum ang a. He chawimawina dawn ringawt hi duhtawk chi a ni lo a, he mi piah lamah hian mawhphurhna a ken tel hi hmuh hmaih chi a ni lo,” a ti.

Chandigarh footballer Jhingan hian 2015 atang khan India senior team lamah a khel tan a, Guwahati khawpuia ram tana a inkhelh tan atang hian tun thlengin Blue Tigers tan game 40 chu a khel tling tawh a, hengah hian goal 4 chu a thun tawh a ni.

2018 kuma India in Intercontinental Cup trophy an lak khan Jhingan hi a tel a, 2019 a Asian champion Qatar nen India rama an inkhelha an inhnehtawk tum pawh khan a khel ve bawk a ni.

Vawi 5 chu Sandesh Jhingan hi India team captain a ni ve tawh a, captain a nih hnuhnun ber chu kumin March thlaah khan niin, Dubai khawpuiah Oman nen an inkhelh tum khan a ni a. Nikumah khan infiamna huanga a thawh hlawk em avangin chawimawina sang Arjuna Award chu an hlan a ni.

Kum 20 mi Suresh Singh Wangjam chuan kumin kum tir lama India leh Oman an inkhelh khan ram aiawhin a vawi khatna atan a khel ve tan a. 2017 kuma FIFA U-17 World Cup tournament-ah khan India aiawhin a feh chhuak ve a ni.

AIFF Academy cadet ni thin Suresh hi season hnih chhung chu AIFF team din Indian Arrows ah khan a tel thin a, I-League lamah a khel ve thin a. Tharum ngah, box-to-box midfielder tha tia hriat hlawh niin, tun dinhmunah senior national team tan game 5 chu a khel tawh a. June thlaa Doha khawpuia FIFA World Cup Qualifiers game 3 an khelh khan Suresh hian bul a tan kim vek a ni.

Copyright © inkhel.com 2021. All rights reserved.