Copa America atana inpuahchahna inkhelah Argentina-in 5-0 in Bolivia an sawp a, Manchester City striker Sergio Aguero chuan ram tan a vawikhat nan hat-trick a siam a Manchester United winger Angel Di Maria pawhin goal hnih a khung ve bawk.
Argentina team-ah hian Champions League final khelh vangin Lionel Messi leh Javier Mascherano-te an tel lo va, mahse an game-ah player pahnihte awmloh hi a hriatloh a an khel tha hle.
Argentina 5-0 Bolivia
[Di Maria 24' 56' (p), Sergio Aguero 29' (p) 31' 51']
Referee: Jorge Osorio
Venue: Estadio San Juan del Bicentenario.
Argentina XI: Romero, Garay, Otamendi, Roncaglia, Rojo, Gago, Banega, Pastore, Lavezzi, Di Maria, Aguero.
Bolivia XI: Quinones, Equino, Zentendo, Morales, Rodriguez, Gamarra, Bejarano, Smedeberg, Lizio, Escobar, Martins.
Argentina coach Gerardo Martino chuan Bolivia an hmachhawn tum hian captain atan Di Maria a hmang a, Manchester United winger hian minute 24-naah yard 25-a hla atangin goal nalh tak a khung a hma an hruai.
Minute li hnuah Bolivia player-in an box chhungah Argentina winger Ezequiel Lavezzi a ti tlu a, penalty a chawi bawk. He penalty hi Aguero-a'n goal-ah a chantir a darkar chanve tlin hmain Argentina hian si hnihin hma an hruai der.
Minute 31-naah Di Maria ball pek atangin Aguero bawk hian goal a khung leh a, hei bakah hi first half-ah goal a lut lo.
Second half tan atanga minute rukna chauhah Aguero bawkin goal a khung leh a, a vawikhat nan ram tan hat-trick a siam.
Rei an khelh hmain minute 55-naah Bolivia player Miguel Hurtado chuan an box chhungah a kutin ball a khawih a penalty a chawi. He penalty hi Di Maria chuan a pet ve thung a goal-ah chantirin chak zawk tur a chiang tawh hle.
Huntawp thlengin goal a luhbelh lo va Estadio San Juan del Bicentenario-ah 5-0 in Argentina an chak.
Kumin Copa America hi tun thla ni 11 atang hian Chile-ah khelh tan a ni dawn a, Argentina hi champion lai Uruguay bakah Paraguay leh Jamaica-te nen group khatah an awmho.
Copa America hnuhnung ber kum 2011-ah khan Argentina hi quarter-final-ah Uruguay hneh lovin an tla a, kum 1993 hnuah he intihsiaknaah hian an la champion leh miah lo.