inkhel

Switch to desktop Register Login

Hneh loh la nei lo Chanmari FC, Reitlang FC tak tak kan hmu tan

  • Written by digimalt

AR Lammual, Aizawl : 19th July, 2012

Mizoram Premier League Play Off chu team tin ten vawi thum theuh an khel ta a, Chanmari FC chuan vawiin July ni 19, 2012 khan an khingpui College Veng FC 2-0 in an hneh a. Khelh thum atangin points awm thei zawng zawng an hlawh chhuak a, point 9 neiin MPL Play off league hma an hruai a. Reitlang FC pawh Top 3 ah an rawn inhlangkai chho ta a, an khingpui Chanmari West FC 3-1 in an hneh ve bawk a ni.

Nimin lamaha Aizawl FC in an khingpui Theiriat FC an draw pui a, hei vang hian point 7 an nei ta a, league table ah pahnihna an ni a. Reitlang Fc leh FC RS Annexe chu vawi hnih ve ve chak neiin, vawi khat ve ve chak loh an neih a. Point 6 ve ve an nei a. Reitlang FC hian goal difference an neih that zawk avangin pathumna dinhmun an hauhva. Point in ang an awm chuan Head to head en tur a ni a, chuta an la in draw a nih chuan goal difference en tur a nih avangin goal khung hnem leh goal chhuah loh a pawimawh dawn khawp mai.

 

Reitlang FC 3-1 Chanmari West FC

Reitlang FC Fitness a lang chho zel. An game hmasa berah chak lo mahse game hnihnaah hnehna an chang a. Chuvang chuan Chanmari West FC an hmachhawn tum pawh hian mahni in rintawkna nasa tak an nei a, inkhelh tan phah atangin Reitlang FC hian an nawr nghal a.

13 mins ah an mamawh chhanna Zion Lalramluaha chuan a rawn siam a, goal hmahruai Reitlang FC tan a khung a, 1-0 in minute 15 pawh an khelh hmain hma an hruai. Hemi hnu hian inkhel inbuk tawk tak kan hmu a, Chanmari West FC pawh hian half chance an nei phei ve ta zauh zauh mai. Goal a lut ta lo vang vang a. First half hun pangai a zo tawh, minute 3 pek belh a ni a. H. Lianzama chuan chiang takin Reitlang FC tan goal hnihna a khung leh ta. Tichuan Reitlang FC hian 2-0 in hma an hruai ta a.

zama

Zama hi play off tan tirh khan finishing touch a nei lo ka lo ti a. Mahse hei goal a khung chho ta malh malh mai. A tlan chak em em a, chanmari West FC defender ten an chelh lo a ni ber mai. Mahse nia ka sawi tawh ang kha, chance a nei tam khawp mai a, tlemin uluk deuh selang chuan goal tam tak thun thei a ni tlat alawm. Zama chanchin hi zep lawk ila. Hyderabad ah a awm lai hian tuna Reitlang FC neitu Mark-a nen hian an inhmelhriat tawh a, Mizoram an rawn chho hnuin heti hian an in chhawm zui chho ta zel a ni.

Second half tan a ni a, chanmari West lam an rawn khel tha chho ve tan a, 50 mins a lo thleng a, F. Lalnunhlua chuan Chanmari West FC tan goal khat a rawn khung ta tlat mai. Hei zet chuan inkhel muhil a rawn kaitho leh ta a. Chanmari West FC lamin chak theihna chance an nei tih an hre thar leh, an si phurh rulh an tum a, an nawr phei ta ngat ngat a. mahse forward tawrawt tak an nei lem lova, wing atanga ball cross a tam, mahse a laia lo dawngsawngtu an awm tlat si lova. An ti goal thei thlawt lo.

74 mins a lo thleng a, Zama chuan mual dinglam sir atangin counter attack a nei a, ball a tlanpui ta nal nal mai, chutah a laiah a cross an , Reitlang player tumah an lo awm si lova, defender ten covering an rawn neih vek hnuah Zohmingthanga chuan ball a chang a, zohmingthanga hi Chanmari West FC defender in a pet thlu ta a, referee in penalty a ham ta vang mai. Chutah Vannunmawia a rawn ding chhuak a. A penalty pet ngai lohna lamah, keeper vei lamah chuan cool takin a pet a, a goal chiang khawp mai. Tichuan goal dang a luh belh ta lova. Reitlang FC chuan 3-1 in Chanmari West FC lakah hnehna an chang ta a ni.

 

Chanmari FC 2-0 College Veng FC

Chanmari FC hian khelh hnih an khelh tawhah an khingpuite an la hneh ve ve. Hetih lai hian College Veng FC erawhin an khingpui hneh an la nei lo. Inkhelh tan a nih atangin team chungnung zawk sawi tur an awm lo ve ve. Rin aiin College Veng an khawng tlat mai. Clear chance sawi tur an nei lo ve ve a, half chance erawh a awm ve zauh zauh. A khawi mah mah kha mahni game khel an awm lova, An khelh dan a mumal lo veve. First half ah hian College Veng FC game in awmzia a nei deuh zawk mah mah niin a lang a. Mahse midfield atanga ball chhuak erawh a tha lo thin khawp mai a, hei vang hian attacking duh angin an nei thei lo. First half ah goal a lo ta lova.

arwre

Second half tan a ni a, chanmari FC game a rawn tha tan tlat. Set Piece atangin goal an khung tep tep, Inkhel inbuk tawk tak a ni kan ti thei tawh lo second half ah chuan. Chanmari FC in draw an tum lo kher mai. An theih tawkin an nawr phei a. Tata chuan goal thunna chance tha zet mai a nei a, keeper awm lovah a thun lo a nih chu. Chanmari FC tan a uihawm khawp ang le. Goal awm lova an inhneh tawk mai tawh dawn emaw tih hnuah thil danglam a thleng ta.

Minute 10 ve chauh a la awm tihah College Veng defender Chhanchhuaha chuan Hlutea ball khalh chu penalty area pawn hretah a pet thlu a, referee chuan a tih tur dik tak a ti, Lalchhanchhuaha hi red card a pe ta a. College Veng kim lovin an khel tan ta a,

College Veng FC hian an goal an veng ta tlat mai si, Chanmari FC tan goal khung a harsa tak zet a ni. Hetih lai hian college Veng FC tan vanduaina a rawn thleng leh, an central defender hnawhchhuah a nih hnu lawkah central defender zonunsiama chu a inhliam ve leh ta a, a ni hi a nat hmel khawp mai.

Central defender rinrawl pahnih an awm ta si lova, chanmari FC chuan chance an nei chho ta. 87 mins a lo thleng a, Chanmari FC captain chhinga chuan chiang set sawtin goal a khung ta a. 1-0 in Chanmari FC hian hma an hruai ta a. 90+2 mins ah Tata chuan Chanmari FC goal hnihna a rawn khung ve leh ta a. Tichuan hun a tawp zui ta, Chanmari FC chuan hneh loh nei lovin, point awm thei zawng zawng an hlawhchhuak ta a. Point 9 hmuin MPL Play Off league hma an hruai ta a ni.

 

Play Off Teams

P

W

D

L

GF

GA

GD

Pts

Chanmari FC

3

3

0

0

8

3

+5

9

Aizawl FC

3

2

1

0

7

0

+7

7

Reitlang FC

3

2

0

1

7

3

+4

6

FC RS Annexe

3

2

0

1

3

3

0

6

Kanan FC

3

1

1

1

6

6

0

4

Theiriat FC

3

0

2

1

4

5

-1

2

Chanmari West FC

3

0

0

3

3

7

-4

0

College Veng FC

3

0

0

3

1

11

-10

0

 


 

inkhel 2013

Top Desktop version