inkhel

Switch to desktop Register Login

MPL Play Off hmahruaitu Aizawl FC

  • Written by digimalt

 

Vawiin July ni 16, 2012, Thawhtan ni hian Mizoram Premier League Play off match hnih a HOT khawp mai. Match hmasa zawkah Kanan FC leh Theiriat FC te 4-4 in an inhneh tawk a. Match hnuhnung zawkah a Aizawl FC chuan 2-0 FC RS Annexe an hneh a. MPL Play Off-ah Aizawl FC chuan an game hnih khelh tawh atangin point awm thei zawng zawng an hmu a, hmahruaitu an ni mek.

Inkhel hmasa zawkah hian Theiriat FC that zia kan hmu a, Kanan FC hian bul an tan tha zawk a, first half ah Lalsangbera goal hnih leh Vanlalhlua goal khat hmangin Kanan FC 3-2 hma an hruai.Theiriat FC lam atang hian kum 16 mi lek Johny VL Muanpuia leh Hmangaihtluanga chuan goal an khung ve bawk a. Theiriat FC hian an match hmasa berah Chanmari FC an lo hneh lo tawh bawk nen, an morale a hniam viau turah ngaih a nih laiin coach tha tak an nei a, Half time ah Coach in a team a fuih nasa tih a hriat.

Second half tan a ni a, Theiriat FC game a rawn dang zar mai. C. Lalramenga chuan 54 mins ah Theriat FC si phurh a rul ta a. chiang set sawtin pen 8 vel atangin goal mawi tak a khung a. 3-3 a ni ta a. Theiriat Fc hi an khel tha chho zel a, goal chance pawh an nei chho ta nawk mai. 70 mins a lo tleng a, defender te tihsual nangchinin Johny VL Muanpuia ngei chuan cool zetin keeper a pet khum a, he goal hi muangchangin Kanan FC lamah a lum lut raih raih a ni. 4-3 in Theiriat FC chuan hma an hruai ta a. Hun tawp dawn minute 10 ala awm chuan Kanan Fc chuan an theih tawkin an nawr ta chur chur mai a, amaherawh chu Theiriat FC an khawng tlat mai.

Referee tihsual vangin Theiriat FC lamah goal a lut ta.

90 mins a thleng tawh, Kanan FC chuan corner an hlawh chhuak a, corner chu Theriat FC keeper Fela chuan a lo nam per, mahse player dangte nen an in tauh palh ni tur a ni, leiah chuan a tla thla hnawk a. Referee chuan Kanan FC chu chance a pe zel a, Kanan FC hian vawi 3 goal -a an shot naah an ti goal ta a. Hetah hian keeper tluk atanga second 6 vel chu referee hian chance chu pe se a awm khawp ang. Mahse penalty area ball in a chhuahsan hnuah leh minute 1 dawn thleng thlenga referee in Kanan FC chance e pe kha chu a tih dik loh chiang tak a ni a. Mizoram Premier League hmel ti bal tu a ni a, inkhel ham zui zel tlak a ni lo. Tichuan Vanlalhlua hmangin Kanan FC chuan goal an khung ta a. 4-4 a ni ta a, Inkhel a zo ta. Point khat ve ve an hlawh chhuak a, Kanan FC hian hneh lo nei lovin point 4 an nei mek a ni.

Hetih lai hian thil pakhat mai mai chu, referee thuthlukna diklo kha Theiriat FC khan tuar lo thei an ni ve tlat, vawi hnih lai clear chance em em an nei. Defender pahnih leh Theiriat FC forward pathum inhmachhawn tum a awm. 4-3 a hma an hruai lai a ni a, khatah khan goal khung tum tak tak se chuan goal 2 kha chu an khung chiang ang. Tichuan referee khan keeper tluk laia a goal kha pawm mahse 6-4 laiin Theiriat FC hi an chak thei dawn tlat. Kha kha chu an la ui dawn a ni.

Theiriat FC tan lawmna tur a awm

Inkhel.com chuan Theiriat FC coach R. Lalmuankima kawmna kan nei a, an lungawi loh thu leh complaint an thehluh thute a sawi a. Hetia an lungawi loh em em lai hian lawmna erawh an nei a, chu chu an khel tha chho zel leh player naupang ten hmasawnna nasa tak an neih avangin a ni a. A dik khawp mai, Theiriat FC No. 8 Johny VL Muanpuia that zia kha inkhel entute chuan kan hre vek awm e. a chak a, ball a thiam a, a tlanpui thei bawk a. Tunah kum 16 lek a la ni a, talent tha tak a neih hi mizoram pawna eizawn theihna tham a nih dawn mai bakah Mizoram leh India ram tana player tha tak a la ni thei dawn chiang tih vawiin khan kan hmu a. hei hi chu Theiriat FC tan chuan thil lawmawm tak a ni chiang a ni.

Aizawl FC 2-0 FC RS Annexe

Aizawl FC hian Third division Zone Football championship FC RS Annexe hi an lo hneh lo tawh a. Hei vang hian hneh ngei an tum tih a chiang a, amaherawh chu an mahni pressure an insiam chawp emaw chu aw tih theih turin MPL Play off match hmasa an tluk lo. Mahse an dawh theihna leh tum ruhna avang liau liauin set piece atangin Sawmtea free kick chu Zoremtluanga chuan a tauh lut a, hun tawp dawnah Johny Lalfakzual chuan Aizawl FC chakna tichiang turin goal hnihna a rawn tauh lut leh a, tichuan Aizawl FC chuan FC RS Annexe si hnih faiin an hneh ta a ni.

Inkhelh tan atangin team hnihte hi an inhlau tawn emaw tih mai turin midfield ah an inbei tawk em em a. Inkhel pawh a hmuhnawm lem lo. FC RS Annexe chuan an striker lei thar an rawn thawh chhuah pui a, Duha hian tlai khaw hnuah Inter State transfer in FC RS Annexe hi a zawm a, vawi khat emaw chauh practice a zawm a, mahse mamawhna a nasat em avangin loh theih lohvin coach in a chhawr a. A chak thain, Aizawl FC tlar hnung a tihthaih ngun khawp mai. Mahse Lone striker a dah a nih avangin leh supporter a neih that loh avangin a tangkai tur angin a tangkai thei ta lo.

aw

First half ah half chance an nei ve ve a, aizawl Fc midfild an khawng a, midfield inbeihna a ni ber mai. 67 mins a lo thleng a, Sawmtea free kick tha zet mai chu tuma mark loh Zoremtluanga chuan near post ah a tauh lut ta mai a. Hemi hnu atang hian inkhel a hmuhnawm chho ta em em a, FC RS Annexe in an si phurh rulh an tum a, hmatawng an indah belh a, chutih laiin Aizawl FC coach Gosen-a erawh chuan midfielder a rawn duhluh belh a, hetia FC RS Annexe in engpawh huama goal thun tuma an nawr lai hian goal khung thei tak Johnny Lalfakzuala chuan 90 mins ah Aizawl FC tan goal a khung ve leh ta si a. Tichuan hun a tawp chuan Aizawl FC chuan 2-0 in hnehna an chang ta a, Tuma chuhpui phak lohvin point 6 neiin MPL Play off hmahruaitu an ni ta a ni.

FC RS Annexe captain kha a vannei khawp mai a, double Yellow card hmuha, hnawhchhuah theihna chance kha a awm chiang mai, mahse referee in a chungah zahngaihna a lantir a.Johny Lalfakzuala khan game hmasa a tluk lo, mahse goal erawh a khung hlauh mai a, a khelh that loh a khuhmawi. Aizawl FC coach a tisual tep, duh aiin midfield play a tum rei lutuk a, Set Piece atanga goal an khung kha chu an vannei ka ti khawp mai a, amaherawh chu FC RS Annexe man marking uluk lo lutuk an hremnaah ka ngai hmiah.  Khelh tur a la tam a, engmah sawilawk theih a ni lova, Aizawl FC in point 6 an hmu fal nalh avang erawh chuan  player ten confidence an neih phah ngei ang le.

inkhel 2013

Top Desktop version