inkhel

Switch to desktop Register Login

MPL ah referee an fimkhur a ngai dawn

  • Written by digimalt

 

Hei Mizoram Premier League chu kan tan chho dawn ta mai chu a ni a, mumang a ang hial a ni. A tira study group ten an zirchian hnua an ruahmanna an rawn phawrh khan a harsat tur ziate mi tutute emaw chuan an sawi, mahse hei atakah a chang ta mek a, Mizoram Football History ropui tak kan ziak dawn ta.

Play off chu July ni 13 atang hian AR Lammualah khelh tan ani dawn a, Play off a ni, mahse MPL tanna a ni nghal dawn bawk a, a ropui dawn khawp mai.Kalphung leh team luh thei zat lam kha chu kan sawi ngun tawh a, tun tum chu match official chungchang hi sawi teh ang.

MFA chuan theih tawkin thuthlukna rintlak tak inkhelhnaah a awm thin theih nan hma a la mek a, MFA referee te chu nasa zawkin trainning a neih pui mek bawk a. Kum dang zawng zawng leh Tournament Mizoram chhunga lo awm tawh zawng zawng aiin tun tuma an mawhphurhna hi sang khawp dawn tih hi hre nawn leh se ka duh khawp mai.

Club indin hi thil namai a ni lova, Bank account ah pawh cheng nuai nga chuang neih a ngai tlat, thil namai a ni lo tawp mai. club khat hian season khat chhung hian sum tam tawk an seng dawn chiang mai.Hetiang khawpa sum leng vak a tam lai hian referee thuthlukna felhlel vanga chak loh chu a na duh khawp dawn a ni.

Sum tam tak leh thi leh thau pawlha khaw hrang hrang atanga fuankhawmte minute khat chhung leka thuthlukna dik loh vangin an Dream tihtawp sak a ni thei dawn chiang mai. Chutah tak chuan fimkhur a va ngai dawn chiang tak em. Tan lam neih leh neih loh kha chu an nei lo turah ngai phawt ila, hetih lai hian thahchhiat vang emaw pressure zawh loh vang emawa thuthlukna diklo tak awm thei a awm dawn tlat mai. Chutah chuan MFA referee te taimak chhuaha fimkhur zual turin ka chah a ni.

Tunah chuan Media a chak tawh bawk nen, MFA lam atangin referee chungchang demna emaw selna awka club manager emaw coach in emaw a chhak chhuak a nih chuan hrem na dan thlengin an la kalpui zel turah ngai ila, Mahse media hmanga nasa taka referee sawiselna a awm thei dawn tho tho. Tunah chuan Mizoram pum titi a ni tawh dawn a, kan referee an che tha a nih chuan mipuiin an fak anga, chutih laiin an che chhia a nih chuan nasa taka media hmanga demna a awm zel dawn. Inkhel ti hmuhnawm thei an nih laiin inkhel hmuhnawm tur tichhe vek thei an ni bawk a, Football changkang leh hmuhnawm kan en theihna tur chu player te khelh dan chauh a ni lovin, referee thuthlukna fing leh inkhel a enkawl dan pawhin nasa takin kawngro a su dawn a ni. chu chu hre rengin, Mizoram Premier League Play off atang hian inkhel.com chuan MFA referee te chungah tha taka inkhel an thunun theih nan duhsakna sang ber kan hlan e.

inkhel 2013

Top Desktop version